أنا إسمى نجاة سيد سالم إسماعيل عندى 42 سنة من قرية العلالمة أنا متزوجة وعندى 5 أبناء (3أولاد وبنتين ) وكلهم غير ملتحقين بمدارس وجوزى يعمل فلاح باليومية وأنا ماسبقش لى أنى اتعلمت قبل كده برغم من وجود فصول محو أمية بالقرية بتاعتى إلا أنى مادخلتش أي فصل وقرية العلالمة بطبيعتها قرية فقيرة وظروف المعيشة فيها بسيطة عشان كده مافكرتش في يوم أنى أدور على موضوع التعليم ده وجه يوم روحت لمكتب السجل المدنى عشان استلم بطاقة الرقم القومى وطبعاً كان شرط استلام البطاقة هو احضار إيصال الإستلام وعشان أنا مابعرفش أقرأ وأكتب أخدت فاتورة الكهرباء بدل إيصال إستلام البطاقة وعشان كده كنت مضطرة أرجع تانى البيت عشان أجيب إيصال البطاقة ، ده غير أنى مرات أخدت الدواء غلط عشان مش عارفة أقرأ اسم الأدوية وحسيت وقتها قد إيه متكتفة وموضوع التعليم ده فارق معايا ولو كان موجود كانت حاجات كتير هتختلف في حياتى .
سمعت بعدها عن فصول محو الأمية بتاعة فودافون مشروع العلم قوة وقلت في نفسى طيب ما أجرب وأدخل يمكن فعلا أستفيد والموضوع يفرق في حياتى وفعلاً دخلت وبدأت ألتزم وأحضر كل يوم لحد ما أمتحن وأخد شهادة وأقدر أشتغل بيها وأساعد جوزى نربى ولادنا كويس.
وبقيت أعرف دلوقتى كمان مين اللى بيتصل بىّ على الموبايل عشان بقدر أعرف اسمه وبقيت حاسة بأهمية إن جوزى وولادى يتعلموا عشان التعليم مفيد جداً.
