أنا إسمي هاجر محمود جمال من قرية تله عندي 13 سنة شاركت مع أطفال القرية و أمهاتهم في مرحلة تهيئة المجتمع قبل انتخاب اللجنة واتعلمت حاجات كتيره ماكنتش أعرفها قبل كده اتعلمت يعني إيه حقوق الطفل وإزاى أطالب بحقي زي التعليم والصحة وإسمي وكمان من حقوقي ألعب وعرفت المواطنة والانتماء والحب لبلدي وإتعلمت إزاى أغير سلوكي علشان أكون كويسه مع زمايلى بالمدرسة وكانت حاجات جديدة مش بنتعلمها في المدرسة .
وإترشحت في انتخاب لجنة الأطفال وكان معايا 15 طفل تاني وعرفنا إزاى نعبر عن رأينا وإزاى نعمل برنامج انتخابي وأنا رسمت لوحات كتيره وكان أستاذي بيساعدني وعرضت كل حاجة علي زمايلى و أصحابي بالمدرسة .
ونجحت في الانتخابات وحضرت تدريب للجنة مرتين عملنا فيها لائحة لتنظيم عمل اللجنة وكان كله برأينا احنا المنتخبين .
انا مبسوطة خالص لأني حسيت بنفسي وكياني وبعرف دلوقتي أقول رأيي بحرية خالص وده ساعدني حتي في المدرسة لأني بهتم بمذاكرتي وخلي عندي طموح كبير .
