أنا إسمى رشا أنور أحمد حسانين عندى 34 سنة من قرية الشيخ على أنا متزوجة وعندى 3 أبناء مصابة بإعاقة في قدمى اليسرى من عمر سنتين وماتعلمتش قبل كده وزوجى يعمل في النقاشة ومستأجر لبوفيه المحكمة ببنى سويف ، واحنا ظروفنا المعيشية بسيطة وطلبات الولاد والبيت كتيرة وفكرت كتير قبل كده أنى أساعد جوزى لكن فكرة أنى مش بقرأ وبكتب خلتنى مش قادرة أعمل حاجة أو أشتغل في أي مكان ، وسمعت السنة اللى فاتت عن فصول محو الأمية تبع مشروع العلم قوة بجمعية الشيخ على وحسيت في الأول إن المشوار بعيد عن بيتى وظروف إعاقتى في قدمى اليسرى ممكن تمنعنى من أنى أروح لكن قررت أنى لازم أتعب شوية عشان أقدر ألاقى نتيجة وفعلا بدأت أروح كل يوم الفصل عشان أتعلم وأساعد جوزى في البوفيه.
وفعلا خلصت فترة فصل محو الأمية واتعلمت وامتحنت ونجحت وطلعتلى شهادة محو أمية كمان ومن ساعتها و أنا بدأت أنزل مع جوزى في البوفيه وأشتغل وأكتب المشروبات والطلبات وبقيت مسئولة عن حساب البوفيه و الطلبات.
وبعدها كمان بدأت أعلم إبنى الحساب و العربى عشان جوزى ماكنش عنده وقت بين شغل النقاشة وشغل المحكمة .
بعد كده حسيت بجد إن حياتى أتغيرت وبقالها قيمة ومن ساعتها وأنا بقنع أي حد أنه يتعلم في الفصل عشان التعليم ده بجد نعمة من ربنا ولازم كل واحد يهتم بيه
