أنا اسمى صفاء عبد الرشيد عيد مواليد 75 وعايشة في دير البرشا ومجوزة وقاعدة بخدم في بيتى وعلى أيامنا ماكنش حد حوالينا بيهتم بالتعليم ولا بيقولنا عليه زى دلوقتى عشان كده مافكرتش في يوم أنى أتعلم ولا اهتميت حتى أروح مدرسة لكن مع الوقت وبعد ما أولادى أتجوزوا وبدأت مرات إبني الأولى والتانية يضحكوا على ويتريقوا لأنى مش بعرف أقرأ ولا أكتب وكمان بيغالطونى في الحساب ويقعدوا يقروا الكلام المكتوب في التلفزيون وأنا مش فاهمة حاجة وده بس علشان واحدة معاها دبلوم وواحدة طلعت من المدرسة بعد الإعدادية مع أنهم مش أحسن مني في حاجة وحتى جوزى بقى يعايرني ويقولي أنتى مابتعرفيش الألف من كوز الذرة يبقى تسكتي كل ده خلانى من جوايا عايزة أتعلم ومبقاش أقل من حد لحد ما سمعت عن فصول محو الأمية اللى تبع فودافون وقالولي إن الفصول دى لما أدخلها هتفرق معايا قوى وهتخلينى أقدر حتى وأنا في وسطيهم أفهم وأقرأ وأكتب وأستوعب حاجات كتير
والحمد لله دلوقتي بعرف أقرأ وأكتب وحياتى فعلاً اختلفت وحاسة إن ماحدش هيقدر يعايرني تاني .
