أنا إسمي أدهم علي عبد الصبور من مدينة ملوي عندي 15 سنة بشتغل في ورشة نجارة كصبي نجار لما أرجع من المدرسة كل يوم وفي الإجازة الكبيرة بشتغل من الصبح للليل. شاركت مع أطفال المنطقة في المشروع الجديد بجمعية الأصدقاء الخيرية وحضرت لقاءات كتيره مع أصحابي وأطفال تاني شغاله في ورش اتعلمنا حاجات كتيره خاصة بحقوق الطفل وكان أهم حاجة أنا اتعلمتها إني أعبر عن رأيي بكل وضوح .
اترشحت في انتخاب لجنة الأطفال واخترت رمز النجمة وحضرت تدريب عن الانتخابات وكيف أصمم برنامج انتخابي قوي وكان معايا 16 طفل تاني ونجحت في الانتخابات وكتبت ورق عن برنامج الانتخاب ووزعته علي الأطفال يوم الانتخاب والحمد لله أنا نجحت وكمان انتخبوني رئيس اللجنة. حضرت تدريب للجنة عملنا فيها لائحة داخلية للجنة وكل الأعضاء وقعوا عليها واحنا بنجتمع مرتين كل شهر.
أنا كان نفسي أحضر انتخابات الرئاسة لكن سني صغير ولما تمت انتخابات اللجنة فرحت علشان اترشحت ونجحت فيها وأنا لما أكبر هترشح في انتخابات مجلس الشعب علشان أحافظ علي حقوق الأطفال.
كان نفسي ألعب زي الأطفال لكن والدي متوفي وأنا بشتغل بعد المدرسة و أصرف علي البيت مع أمي علشان الحالة المادية ضعيفة والمصاريف كتير .
أنا سعيد علشان المشروع ده بيساعد الأطفال اللي زي وفرحت أكتر إني أنا واللجنة هنشارك في وضع أنشطة المشروع مع أعضاء الجمعية علشان نعمل أنشطة محتاجها الأطفال فعلاً .
