أنا اسمي محمود عبد الحميد خريج كلية التجارة جامعة أسيوط سنة 2012 من وقت ما اتخرجت وخلصت الجيش بتاعي وأنا أبحث عن وظيفة ومش لاقي وظيفة اتقبل فيها كل ما ادور على شركات أو أماكن طالبة محاسبين ألاقي إن من الشروط إن لازم يكون عنده خبره أو حاصل على كورسات محاسبة ويجيد التعامل مع الكمبيوتر لما فكرت شوية لقيت عندهم حق لأن دلوقتي كل شغل المحاسبة بيكون على الكمبيوتر على برنامج الإكسيل وغيره من برامج المحاسبة اضطريت إني أدور أخد كورسات علشان تساعدني إني أشتغل وظيفة كويسة وفي تخصصي والمهنة اللي بحبها ولما رحت وسألت على كورسات المحاسبة لقيت تكلفة الكورس الواحد غالي جداً غير إن فيه أكتر من برنامج زي التدريب النظري والمحاسبة على الإكسيل وغيره يعني مكنتش هقدر أدفع كل الفلوس دي كلها علشان الكورسات غالية خالص وبدأت أدور على أي وظيفة وخلاص واشتغلت في محل ملابس في طه حسين في المنيا بائع وفي يوم عرفت من أصحابي إن فيه مشروع عندهم وفيه تدريب محاسبة للشباب مجاني بصراحة في أول الموضوع مكنتش مصدق إن التدريب مجاني لأني عارف إن تدريب المحاسبة ده تكلفته عالية بس وافقت وقلت مش مشكلة حتي لو هدفع جزء ورحت جمعية الأسر المسلمة وعرفت إنها بتتعاون مع الهيئة القبطية الإنجيلية في مشروع لتدريب وتوظيف الشباب وقدمت ومليت الاستمارة وبعد كده حددولي ميعاد مقابلة ودخلت حسيت من المقابلة إن فعلا الموضوع جد ومن الأسئلة اللي بيسألوهالي إن فعلاً عايزين ناس تكون عايزة تستفاد ومحتاجة التدريب ورديت على الأسئلة وقالولي إنهم هيتصلوا بيا يدوني ميعاد التدريب إذا قبلت وفعلا بعد يومين اتصلوا بيا وأدوني ميعاد التدريب في مكان نظيف جدا وامكانيات ممتازة للتدريب في أكاديمية سمارت، كمان المدرب لقيته دكتور جامعة في بني سويف كمان لقيت المادة العلمية نفسها ومحتوى التدريب ينفع يخلى أي شخص يشتغل بيه بعد ما يخلص وبياخد كل اللي محتاجه في العمل، استفدت جدا جدا حاولت علي قد ما أقدر إني استفاد بأكبر قدر ممكن من كل كلمة بيقولها الدكتور وأسجل وراه كل كلمة كمان الجمعية وفرت لينا المادة العلمية علي اسطوانات ودي كانت برده ميزات أنا مكنتش متوقعها .
ومش كده بس كمان في خلال تدريبنا كانوا بيقلولنا بالوظائف الموجودة والشركات والمصانع اللي طالبة محاسبين وقالولي إن فيه مصنع رويال للأسمنت طالب محاسب ومدير مكتب عنده، فعلا رحت وقدمت أوراقي حسيت أني لما أدخل المقابلة المرة دي فعلا هكون واثق من نفسي وهعرف أرد على الأسئلة بتاعتهم لأني استفدت كتير جدا من التدريب .
أنا بس عايز أشكر كل اللي ساعدوني على إني أوصل لكده وإني أتعلم وإني أحقق اللي أنا كان نفسي فيه من زمان وهو أني اشتغل في تخصصي والمهنة اللي بحبها وأتمنى إن شباب أكتر وأكتر تستفاد من التدريبات دي وإن الموضوع ميبقاش فترة صغيرة لأن فعلاً فيه أصحابي كتير وغيرهم محتاجين إنهم يستفادوا ويتعلموا .
